Nýtt á Blog.is

Upplýsingar um heimsóknir á bloggsíður á blog.is eru nú greinilegri og betur fram settar.

Þegar farið er inn í stjórnborðið sést ofarlega síðunni liðurinn Heimsóknir og ef smellt er á hann sjást heimsóknartölur í myndrænni framsetningu. Hægt er að velja graf yfir flettingar, innlit, staka gesti eða IP-tölur og eins má velja mismunandi tímabil.

Með kveðju,

Samþykktarferli fyrir athugasemdir

Nú er hægt að óska eftir því að athugasemdir við bloggfærslur birtist ekki fyrr en þær hafa verið samþykktar af höfundi færslunnar. Við skráningu athugasemda birtast þá skilaboðin Athugasemdin mun birtast eftir að höfundur færslunnar samþykkir hana. Í framhaldi fær höfundur færslunnar tilkynningu í tölvupósti um athugasemdina sem inniheldur krækjur til að staðfesta eða hafna athugasemdinni á fljótlegan máta.

Þessa stillingu má virkja á stillingasíðunni fyrir blogg, Stillingar / Blogg í stjórnborðinu, með því að velja Birta athugasemdir aðeins eftir að ég hef samþykkt þær.

Þetta nýja fyrirkomulag virkar einnig fyrir albúm sem tengd eru bloggum sem krefjast samþykktar.

Í tengslum við þessa viðbót hefur viðmót fyrir athugasemdir í stjórnborðinu verið bætt til muna. Þar birtist nú samþjappað yfirlit yfir athugasemdir, flokkað eftir færslum eða myndum. Þar má samþykkja, hafna, birta eða fela athugasemdir. Listana má finna á síðunum Blogg / Athugasemdir og Myndir / Athugasemdir.

Stuðningur við RSS-innlestur

Nú geta notendur á blog.is loks sett inn RSS-strauma af sínum uppáhaldsvefjum á bloggsíðuna sína. Til þess þarf að gera eftirfarandi:

1. Stofna lista af gerðinni "RSS-straumur" með því að fara í "Tenglar og listar" í stjórnborðinu, og setja í listann þær RSS-slóðir sem maður vill birta efni úr á síðunni. Sé þess óskað er hægt að stofna fleiri en einn lista og þannig flokka RSS-straumana eftir innihaldi þeirra.
2. Fara í Stillingar => Útlit => Síðueiningar og koma síðueiningunni "RSS-box" fyrir þar sem maður vill.

Hægt er að stilla hámarksfjölda færslna sem birtast úr hverjum RSS-straumi. Annars vegar er hægt að tilgreina þetta fyrir hverja slóð fyrir sig þegar henni er bætt á listann, og hins vegar er hægt að stilla síðueininguna "RSS-box" með því að smella á hana á síðueiningasíðunni í stjórnborðinu (eftir að búið er að koma henni fyrir) og breyta svo gildinu við "Hámarksfjöldi sýndra færslna í RSS-straumi". Ef hámark er tilgreint á báðum stöðum, er það lægri talan sem gildir.

Breytingartillögur í leiðréttingapúkanum

Við vekjum athygli á því að í nýtilkomnum leiðréttingapúka á blog.is er ekki einungis hægt að leita uppi villur heldur einnig fá tillögur að leiðréttingum. Það er gert með því að smella á undirstrikuðu orðin.

 

Leiðréttingarpúki og ítarlegri talning

Skráðum notendum blog.is er nú boðin sú þjónusta að láta leiðréttingarpúka lesa bloggfærslur yfir. Til að virkja púkann er smellt á hnappinn Púki sem er að finna á síðunni þar sem bloggfærslurnar eru skrifaðar. Púkinn merkir með rauðu þau orð sem hann telur að séu rangt stafsett. Innsetning púkans er í samvinnu við Friðrik Skúlason.

Að ósk margra bloggnotenda hafa upplýsingar um umferð á bloggsíður verið töluvert endurbættar. Nú eru eftirfarandi upplýsingar sýndar:

Flettingar:

• í dag
• síðastliðinn sólarhring
• síðastliðna viku (þ.e. síðustu 7 heila daga)
• frá upphafi (að hluta áætlað út frá gamla heimsóknakerfinu)

Aðrar upplýsingar:

• Innlit í dag
• Innlit síðastliðna viku
• Gestir í dag
• Einkvæmar IP-tölur í dag

Fletting á sér stað þegar tiltekinn notandi sækir einhverja síðu á viðkomandi bloggi.  Með innliti er átt við tiltekinn notanda sem skoðar eina eða fleiri síður á viðkomandi bloggi á innan við klukkustund. Með gesti er átt við tiltekinn notanda sem skoðar eina eða fleiri síður á viðkomandi bloggi á tilteknum degi.

Umferðaruppplýsingar eru nú uppfærðar á 3ja mínútna fresti (í stað 15 mín.áður).

Kveðja,
blog.is

Ruslathugasemdir og fréttatengingar

Nýverið var forminu til að senda inn athugasemdir breytt til þess að það virki í sem flestum vöfrum. Þetta hafði í för með sér að ruslvélmennum víðs vegar um heiminn tókst að setja inn miður skemmtilegar athugasemdir á blogg sem leyfðu óskráðum notendum að skrifa athugasemdir án staðfestingar netfangs. Til að sporna við þessu er nú nauðsynlegt fyrir óskráða notendur að svara einfaldri spurningu áður en athugasemd er send inn, leggja saman tvær tölur og setja útkomuna inn í svæðið "Ruslpóstvörn":

Tengingar bloggfærslna við fréttir á Mbl.is hafa verið notaðar mikið og stundum til að tengja óviðeigandi efni. Því höfum við sett á laggirnar kerfi til að merkja slíkar tengingar sem óviðeigandi. Tengingar eru merktar með því að smella á krækjuna sem birtist neðan við titil fréttar:

Tilkynningar sem berast eru síðan skoðaðar af starfsmönnum Mbl.is og fréttatengingar fjarlægðar ef þurfa þykir. Þess skal getið að einungis innskráðir notendur geta gert athugasemdir við tengingar.

Leiðbeiningar um lausn innskráningarvandamáls

Nýlega voru gerðar ýmsar öryggsbreytingar á blog.is. Þessar breytingar snúa einkum að innskráningu og samskiptum með JavaScript. Ef eldri útgáfur af skrám af blog.is eru forvistaðar í tölvu notanda getur hann lent í vandræðum með innskráningu. 

Til að leysa málið þarf að gera eftirfarandi:

• Hreinsa forvistaðar skrár (cache) í vafranum. Sjá nánar hér að neðan.
• Fara aftur inn á bloggsíðuna og skrá sig inn upp á nýtt.

Ástæður fyrir því að vafrinn forvisti skrár of lengi geta verið ýmsar, en ein skýring gæti verið að dagsetningin sé rangt stillt á viðkomandi tölvu.

Til að hreinsa út forvistaðar skrár má gera eftirfarandi:

(A) Fyrir Internet Explorer 6 (Files valmynd er efst til vinstri á vafranum):

Smellið á Tools og síðan á Internet Options. Fyrir miðju á tilmælaglugganum sem kemur upp er reitur sem kallast Temporary Internet Files. Smellið á hnappinn Delete Files sem birtist þar og síðan á OK og aftur á OK. Að því loknum þarf halda niðri CTRL-hnappi og smella á F5 hnapp efst á lyklaborðinu eða hugsanlega að endurræsa vafrann, þ.e. slökkva á honum og ræsa aftur.

(B) Fyrir Internet Explorer 7 (Tools valmynd er efst til hægri á vafranum):

Smellið á Tools og síðan á Internet Options. Fyrir miðju á tilmælaglugganum sem kemur upp er reitur sem kallast Browsing History. Smellið á hnappinn Delete sem birtist þar og síðan á Delete Files efst í glugganum sem kemur upp. Smellið á Yes í litla glugganum sem birtist, síðan á Close neðst í glugganum þegar tölvan er búin að hreinsa biðminnið og loks á OK. Að því loknum þarf halda niðri CTRL-hnappi og smella á F5 hnapp efst á lyklaborðinu eða hugsanlega að endurræsa vafrann, þ.e. slökkva á honum og ræsa aftur.

(C) Fyrir Firefox 2.0:

Smellið á Tools og síðan Clear Private Data. Í tilmælaglugganum sem þá kemur upp þarf að haka við a.m.k. Cache og Authenticated Sessions. Smellið á hnappinn Clear Private Data Now. Endurræsið svo vafrann, þ.e. slökkvið á honum og ræsið aftur.

Mistök í uppfærslu - lykilorðum breytt

Fyrir mistök í uppfærslu hugbúnaðar nú í morgun birtust neðst á bloggsíðum upplýsingar um eiganda viðkomandi síðu, þar á meðal lykilorð þeirra. Þessar upplýsingar voru faldar í forritskóða mjög neðarlega á síðunni og ólíklegt að gestir á síðuna hafi kynnt sér þær. Til að koma í veg fyrir misnotkun var lykilorðum allra notenda blog.is breytt í kjölfarið og þau send þeim í tölvupósti.

Hotmail notendur athugið: Póstur frá mbl.is á það til að lenda í "Junk Mail" hólfinu. Gáið þar ef þið sjáið ekki póstinn frá okkur.

Aðstandendur blog.is
[e-mail]

Verðlaunaþemu úr þemasamkeppni blog.is nú aðgengileg

Nýverið efndi mbl.is til hönnunarsamkeppni um flottasta þemað fyrir síður á bloggsvæðinu blog.is.

Fjölmargar tillögur bárust, en verðlaunin fyrir besta þemað voru Dell Latitude D520-fartölva frá EJS.

Sérstök dómnefnd mbl.is valdi svo besta þemað, en höfundur þess er Árni Torfason. Hans útlitsþema ásamt innsendingunum sem völdust í 2. og 3. sæti standa notendum blog.is til boða sem útlit frá og með deginum í dag. Fleiri þemu sem bárust munu svo bætast við á næstunni.

Til að velja þema fyrir blogg, er Velja þema við viðeigandi blogg valið á forsíðu stjórnborðsins. Verðlaunaþemun birtast undir flokknum Þemasamkeppni. Þemað hans Árna kallast hamstur.is. 

hamstur.is 

Blíð er barnshöndin 

 

Fjallmyndarlegt 

Nettar nýjungar

Hér á Netdeild Morgunblaðsins er alltaf verið að bæta bloggvefinn blog.is og hafa ýmsar nettar en gagnlegar breytingar verið gerðar síðustu daga.  

Ritillinn sem notaður er til að skrifa athugasemdir hefur verið uppfærður og nú er hægt að sníða texta athugasemda, setja inn krækjur, broskalla og fleira með lítilli fyrirhöfn.

Fjölda nýrra broskalla hefur verið bætt í ritlana, bæði athugasemdaritilinn og færsluritilinn. Allir ættu því að finna eitthvað við hæfi til að tjá tilfinningar sínar!

Leiðsögn í myndaalbúmum hefur verið einfölduð og síðu sem sýnir yfirlit yfir öll albúm bætt við. Sú síða er aðgengileg með því að smella á Albúmin mín í leiðakerfi bloggs. Að auki er nú möguleiki á að birta skyggnusýningu af myndum albúma, þ.e. skipta sjálfkrafa á milli mynda í albúmum. Þegar myndir eru skoðaðar birtist ,,play" takki sem hefur sýninguna.

Þar eð margir byrja á því að skrifa færslur í Word hefur nýjum hnappi verið bætt í færsluritilinn sem er sérstaklega ætlaður til að líma inn texta sem afritaður hefur verið úr Word. Þegar texti er límdur inn á þennan hátt hreinast óþarfa stílsnið út og textinn verður viðráðanlegur. Hnappurinn er auðþekkjanlegur á W-inu.

Njótið vel!